Önnur myndin um vampíruna Edward Cullen og félaga „New Moon: The Twilight Saga“ sló nýjustu Harry Potter myndinni við í seldum miðum er hún var frumsýnd á miðnætti í Bandaríkjunum. Myndin rakaði 26,3 milljónum dollara í kassann á meðan „Harry Potter and the half blood prince“ náði aðeins 22,2 milljónum dollara þegar hún setti metið í sumar.

Er myndin sögð slá forvera sínum léttilega við í miðasölu á næstunni en ekki eru allir á eitt sáttir við myndina. Gagnrýnendur segja hana vera í verri kantinum og segja einungis hörðustu aðdáendur sögunnar geta notið hennar, á meðan aðrir geti litið á hana sem brandara. Þá hefur Vatikanið lýst andúð sinni á myndinni og segja hana uppfulla af djöfullegum skilaboðum og ættu allir því að varast hana.