Það gengur mikið á innan Knattspyrnusambands Íslands. Krítarkortanotkun fjármálastjóra sambandsins, Pálma Jónssonar, í Sviss vakti mikla athygli, og nú er formaður þess, Geir Þorsteinsson, að skilja við konu sína til margra ára.

„Já, það er rétt,“ segir Geir Þorsteinsson formaður Knattspyrnusambands Íslands við Séð og Heyrt spurður hvort hann sé að skilja, en vildi að öðru leyti ekki tjá sig um skilnaðinn eða ástæður hans.

Geir og kona hans, næringarþerapistinn Helga Ingibjörg Kristjánsdóttir, sem er alltaf kölluð Inga, hafa ákveðið að skilja eftir áralanga sambúð. Þau eiga saman eina dóttur.

Það hefur gengið mikið á í herbúðum Knattspyrnusambandsins undanfarin misseri, en Pálmi Jónsson fjármálastjóri þess, komst í fréttirnar vegna notkunar á krítarkorti sambandsins á strippbúllu í Sviss. Málið olli miklum titringi og hefur til að mynda Femínístafélag Íslands krafist afsagnar stjórnar Knattspyrnusambandins og Katrín Jakobsdóttir menntamálaráðherra óskað eftir skýringum.

Geir glímir því ekki einasta við íslenska femínista og fjármálahneyksli þessa dagana heldur einnig skipbrot í einkalífinu.

Honum skaut uppá stjörnuhimininn í íslenska knattspyrnuheiminum þegar hann tók við embætti formanns Knattspyrnusambandsins af Eggerti Magnússyni árið 2007.

Geir er harður KR-ingur og starfaði lengi á vegum félagsins áður en hann hóf störf hjá Knattspyrnusambandinu, þykir skemmtilegur maður og þá ekki síst í samkvæmum og á ferðalögum erlendis.