Fjárfestingarleið Seðlabankans hefur réttilega verið til umræðu undanfarna daga, enda ljóst að margt sterkefnað fólk gat nýtt sér leiðina og fengið krónur með ríflegum afslætti og fjárfest hér á landi. Einn þeirra sem nýtti sér þessa leið er Jónas Hagan Guðmundsson sem gert hefur sig gildandi að undanförnu sem stór hluthafi í Kviku-banka. Hann keypti krónur fyrir evrur fyrir 187 milljónir í október 2013 á genginu 210. Gengið núna er ríflega 120 krónur, svo líklegt er að gengishagnaður af þessum viðskiptum sé um 70 milljónir króna, sem verður að teljast nokkuð gott.
Innan Kviku-banka er eftir því tekið að Jónas er hluthafi af gamla skólanum og hefur sterkar skoðanir á mönnum og málefnum. Þykir augljóst að hann ætli sér stærri hluti innan bankans, sem er einmitt um þessar mundir að sameinast fjármálafyrirtækinu Virðingu.