Vandræðagangurinn er hins vegar ekki einskorðaður við Vinstri græn heldur hafa bæði Framsóknarmenn og Sjálfstæðismenn verulegar áhyggjur af stöðu mála innan sinna raða. Sjálfstæðismenn hafa raunar glímt við oddvitavandræða um langt skeið. Halldór Halldórsson sem kom að vestan til að rífa upp borgarstjórnarflokkinn hefur ekki reynst sá bjargvættur sem vonir stóðu til að hann yrði flokknum og ekki þykja næstu menn á listum, Kjartan Magnússon, Áslaug Friðriksdóttir eða Marta Guðjónsdóttir líkleg til afreka. Því er líklegt að einn ganginn enn verði reynt að sækja einhvern utanaðkomandi til starfans. Nafn Gunnars Einarssonar, bæjarstjóra í Garðabæ, hefur verið nefnt í þeim efnum. Nýjasta nafnið sem heyrst hefur hvað varðar áhuga á oddvitasætinu er hins vegar Sirrý Hallgrímsdóttir, fyrrverandi aðstoðarkona Illuga Gunnarssonar í menntamálaráðuneytinu. Ekki er ljóst hvað flokksforystunni þykir um þær hugmyndir.