Sigríður Á. Andersen dómsmálaráðherra hellti sér yfir Guðmund Andra Thorsson í grein í Fréttablaðinu í gær. Grein Sigríðar var svar við skrifum Guðmundar á sama vettvangi síðastliðinn mánudag. Þar vandaði Guðmundur Sigríði ekki kveðjurnar og kallaði hana strút sem stingi höfðinu í sandinn gagnvart umhverfismálum. Sigríður svarar því til að það sé skrítið að maður eins og Guðmundur telji sig þess umkominn að messa yfir fólki um umhverfismál, í ljósi þess að hann birti skrif sín í blaði, prentuðu á innfluttan pappír, sem berist óboðið inn á 80 þúsund heimili og endi sem sorp. Það sé óskapleg sóun og umhverfissóðaskapur. Það er gleðiefni ef þetta er orðin skoðun Sigríðar og hún ætli nú að leggjast á sveif með umhverfinu. Það er reyndar fráhvarf frá skoðunum hennar sem hún lýsti árið 2015, þar sem hún lagði meðal annars til að grænir skattar á bíla og eldsneyti yrðu afnumdir. Sömuleiðis hefur Sigríður áður sagt lítinn ávinning af því að draga úr útblæstri bíla, heildarlosun þeirra sé hlutfallslega lítill þáttur. Sigríður virðist því hafa dregið höfuðið upp úr sandinum.