Össur Skarphéðinsson sannar enn að hann er með skemmtilegri pennum. Í Facebook-færslu sinni sem hefur yfirskriftina Syndlausir Framsóknarmenn spyr hann: „Eru Elsa Lára, Sigmundur Davíð, Sigurður „okkar“ Hannesson og allir hinir vammlausu í Framsókn búin að gleyma 450 milljarða afslættinum sem þau gáfu vogunarsjóðunum með því að falla á einu augnabliki frá samþykkt Alþingis um útgönguskatt og taka í staðinn upp svokölluð „stöðugleikaframlög“?“
Framsóknarmennirnir sem hann beinir spjótum sínum að hafa gefið í skyn að ríkisstjórnin gangi erinda vogunarsjóða. Össur rifjar síðan upp hvernig tryllt gleði braust út í hópi kröfuhafa þegar þeir beygðu ríkisstjórn Sigmundar Davíðs til þeirrar niðurstöðu.