Staða framkvæmdastjóra fjármálastöðugleika hjá Seðlabanka Íslands var auglýst til umsóknar um liðna helgi en í síðasta mánuði var tilkynnt að Sigríður Benediktsdóttir myndi láta af því starfi 1. október næstkomandi. Sigríður tekur þá til starfa við Yale-háskóla en eiginmaður hennar fékk fyrr á þessu ári leyfi frá Landspítalanum til að hefja störf sem dósent við læknadeild sama háskóla vestanhafs.
Ljóst er að ýmsir horfa hýru auga til starfsins, bæði innan og utan Seðlabankans. Sá sem er helst nefndur sem líklegur eftirmaður Sigríðar er Þorvarður Tjörvi Ólafsson en hann hefur starfað sem hagfræðingur hjá Seðlabankanum um árabil. Er hann meðal annars sagður vera í miklum metum hjá Má Guðmundssyni seðlabankastjóra en það gæti haft mikið að segja þegar ráðið verður í stöðuna.