Tilkynnt var um það í liðinni viku að fjárfestirinn Jón Von Tetzchner hefði keypt hlut í fjölmiðlinum Hringbraut og væri eftir kaupin orðinn næststærsti hluthafi félagsins. Ekki var greint frá því hvert kaupverðið var á hlutnum en ljóst er að aðkoma Jóns styrkir til muna rekstrargrundvöll fjölmiðlafyrirtækisins.
Eftir að hafa auðgast verulega á sölu norska hugbúnaðarfyrirtækisins Opera hefur Jón beint sjónum sínum að fjárfestingum á Íslandi á allra síðustu árum. Þannig var Jón stórtækur þátttakandi í fjárfestingaleið Seðlabankans, þar sem fjárfestum bauðst að skipta erlendum gjaldeyri yfir í íslenskar krónur með 20–30% afslætti, og kom hann með marga milljarða til landsins með þeim hætti á árunum 2012 til 2015. Þeir fjármunum hefur verið farið til fjárfestinga í fasteignum og kaupum á ýmsum íslenskum fyrirtækjum – núna síðast í Hringbraut.
