Íbúar í Fjarðabyggð eru sumir hverjir í forundran vegna þeirrar meðferðar sem Eskfirðingurinn Hannes Sigmarsson læknir fær hjá þeim sem ráða ferðinni hjá Heilbrigðisstofnun Austurlands. Hannesi var vikið tímabundið frá störfum árið 2009, fyrir næstum þremur árum, og hefur síðan orðið að stunda vinnu sína annarsstaðar á landinu. Á sama tíma vantar lækna í heimahéraði hans. Hannes hefur sótt um störf en stofnunin brást ókvæða við og sendi honum skammarbréf þar sem Hannesi var bannað að sækja um störf.