Einn kjósenda í þjóðaratkvæðagreiðslunni um Icesave skilaði vísukorni í kjörkassann síðastliðinn laugardag, í staðinn fyrir að taka afstöðu til laganna. Segir á ísfirska fréttavefnum Skutli að höfundur vísunnar hafi merkt hana með dulnefninu Auður Auðar.

Segir í vísunni að tilgangur atkvæðagreiðslunnar hafi verið að skera formenn Framsóknar- og Sjálfstæðisflokks, Sigmund Davíð Gunnlaugsson og Bjarna Benediktsson, úr snöru. Vísan er eftirfarandi:

Hvað hefur fólkið á kjörstað að gera,
kjósa um eitthvað sem ekki er til?
Jú, Bjarna og Sigmund úr snöru að skera,
skarfa sem ég hvorki vil eða skil.