Grein Björgvins G. Sigurðssonar á Pressubloggi hans um persónulegar árásir á hann úr netheimum hefur ekki skilað honum samúð. Umræðan hefur þvert á móti snúist gegn honum og í bloggheimum hellast yfir hann ásakanir um ábyrgð hans á hruninu. Fæstir höfðu heyrt af meintum drykkjuskap hans eða framhjáhaldi. Þykir sýnt að Björgvin hafi ekki aðgang að góðum ráðgjöfum í almannatengslum sem örugglega hefðu sagt honum að halda kyrru fyrir í stað þess að berjast við vindmyllur. Þá þykir ekki trúverðugt að Björgvin skuli ætla að beita sér af alefli fyrir löggjöf til að koma böndum á nafnleysingja. Menn skyldu ætla að Björgvin ætti að nota alefli sitt til að berjast fyrir upprisu Íslands. Hann situr uppi með að hafa gengisfallið við grein sína.