Mikilvæg áminning til foreldra í tilefni 17. júní

Mynd: Mynd Photos.com

Þjóðhátíðardagurinn, 17. júní, er í dag og honum fylgja hátíðarhöld víða um land. Í tilefni dagsins birtir Neytendastofa nauðsynlega áminningu til foreldra og forráðamanna barna.

„Börnum er þessi dagur oft sérstakt tilhlökkunarefni enda jafnan ýmis skemmtun í boði til að gleðja þau. Svo þessi stund verði sem ánægjulegust er mikilvægt að hugað sé að öryggi barna.

Út um allan bæ um allt land má víðast hvar sjá blöðrur af ýmsum toga og eru álblöðrur þar einna mest áberandi. Á þær eru gjarnan sett gjafabönd sem stundum eru mjög sterk og næstum óslítanleg, jafnvel fyrir fullorðna. Blöðrurnar eru síðan afhentar börnum, oft eru þær bundnar við barnvagna eða úlnliði barna. Þetta getur skapað hættu fyrir ung börn, sér í lagi ef þau eru ekki undir stöðugu eftirliti fullorðinna,“ segir Neytendastofa.

Bent er á að blöðrur, líkt og önnur leikföng, sem markaðssettar eru á Íslandi eiga að vera CR merktar og uppfylla ákvæði staðla og reglna sem um þær gilda.

„Forráðamönnum barna er bent á að blöðrur ætti alls ekki binda við vöggu, rúm eða handleggi barna eða þar sem börn eru án stöðugs eftirlits.

Njótum 17. júní hátíðarinnar sem og annarra gleðidaga prýdda blöðrum, gleðilega hátíð,“ segir Neytendastofa að lokum.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.