Neytendastofa tekur leikföng sem seld voru í versluninni Minn heimur úr umferð – Voru ekki CE-merkt
Neytendastofa hefur sett sölu- og afhendingarbann á tólf tegundir tuskudýra í versluninni Minn heimur þar sem ekkert þeirra hafði fengið CE-vottun líkt og reglur kveða á um. Alls var um að ræða 124 tuskurdýr sem Neytendastofa lagði hald á og verður fargað.
Í tilkynningu á vef stofnunarinnar segir að í kjölfar ábendingar um að mjúkdýr í versluninni væru ekki í lagi hafi 124 þeirra verið tekin til nánari skoðunar. Í ljós kom að CE-merkingar vantaði á öll þeirra.
„Þá voru sum mjúkdýrin byrjuð að rifna meðfram saumum og fyllingin farin að detta úr. Það getur skapað hættu fyrir ungabörn þar sem ekki er vitað um efnainnihald fyllinganna auk þess sem að það getur valdið köfnunarhættu. Þá voru sum mjúkdýranna með batterí sem auðveldlega gátu losnað úr þegar saumarnir byrja að rifna.“
Neytendastofa óskaði eftir gögnum um framleiðslu tuskudýranna en engin svör bárust frá rekstraraðila verslunarinnar. Stofnunin vekur þó athygli á því að engar tilkynningar hafi borist um slys af völdum leikfanganna, sem meðal annars voru í formi vinsælla teiknimyndapersóna á borð við Svamp Sveinsson, Hello Kitty, Spiderman og Minions. Tilkynninguna og ákvörðunina í heild sinni má nálgast hér.