Hægt að velja á milli níu erlendra borga fyrir sama verð og til Akureyrar

Hægt er að velja á milli níu áfangastaða í Evrópu fyrir svipað verð og greitt er fyrir flug til og frá Akureyri yfir páskahátíðina. Þannig væri til að mynda hægt að verja páskunum á útikaffihúsum í Amsterdam, í göngutúrum í París eða í skíðabrekkum í Noregi. Rúmlega 15 þúsund króna verðmunur er á ódýrasta erlenda áfangastaðnum og höfuðstað Norðurlands.

Samkvæmt skýrslu Greiningar Íslandsbanka um ferðaþjónustuna sem kom út í febrúar síðastliðnum er Ísland dýrasta landið þegar kemur að farþegaflutningum, sem stafar meðal annars af færri möguleikum í samgöngum en víða erlendis. Einnig kemur þar fram að ferðamenn séu ekki að nýta sér innanlandsflug að neinu marki; á sama tíma og farþegum í innanlandsflugi hefur fækkað um 6 prósent frá árinu 2010 hefur ferðamönnum fjölgað um 175 prósent. Því virðist sem vöxtur ferðaþjónustunnar hafi nær engin áhrif á á innanlandsflug.

65 þúsund allt í allt

Hér er miðað við tvo fullorðna einstaklinga sem hyggjast fljúga frá Reykjavík miðvikudaginn 12. apríl og koma til baka annan í páskum, þann 17. apríl.

Miðað er við svokallað netverð við pöntun á vef Flugfélags Íslands. Flogið er frá Reykjavík klukkan 16.10 síðdegis og kostar farið 13.100 krónur á mann. Farangur er þar ekki innifalinn. Leyfilegt er að hafa meðferðis allt að 6 kíló í handfarangri. Farangursheimild upp að 20 kílóum kostar 990 krónur aukalega.

Við heimferð er ekki hægt að velja netverð, heldur er einungis hægt að velja á milli ferðasætis og fríðindasætis og er ferðasætið valið, enda ódýrari kostur. Þá kostar farið 19.625 krónur á mann og fylgir þá með farangursheimild upp á allt að 20 kíló.

Flug til og frá höfuðstað Norðurlands að viðbættum farþegagjöldum kostar þannig allt í allt 65.450 krónur fyrir tvo einstaklinga.

Ódýrast til Edinborgar og dýrast til Köben

Við leit á vef Dohop kemur í ljós að fyrir svipað verð er hægt að velja um flug til og frá níu áfangastöðum í Evrópu. Innifalið í verðinu eru þá tilheyrandi gjöld og skattar, auk handfarangursheimildar fyrir báða aðila. Á 6 af þessum 9 stöðum er flugið undir 65 þúsund krónum.

Ódýrasti áfangastaðurinn er Edinborg, en flugfar þangað til og frá fyrir tvo kostar 49.991 krónu, sem er 15.460 krónum ódýrara en ferðalagið til Akureyrar. Dýrast væri að fljúga til Kaupmannahafnar en flugið þangað og heim fyrir tvo kostar 67.991 krónu og er því tæplega 2.500 krónum dýrara en til og frá Akureyri.


Edinborg með WOW air

Flug fyrir tvo m. sköttum og gjöldum + handfarangursgjald: 49.991 kr.
Mismunur: 15.459 kr.


Frankfurt með WOW air

Flug fyrir tvo m. sköttum og gjöldum + handfarangursgjald: 55.991 kr.
Mismunur: 9. 459 kr.


Stokkhólmur með WOW air

Flug fyrir tvo m. sköttum og gjöldum + handfarangursgjald: 56.991 kr.
Mismunur: 8.459 kr.


Osló með SAS

Flug fyrir tvo m. sköttum og gjöldum. Handfarangur innifalinn.: 57.068 kr.
Mismunur: 8.382 kr.


Björgvin með SAS og Norwegian Air – bókað í gegnum vefinn mytrip.com. 10 klst. millilending í Osló

Flug m. sköttum og gjöldum. Handfarangur innifalinn: 60.062 kr.
Mismunur: 5.388 kr.


Amsterdam með WOW air

Flug fyrir tvo m. sköttum og gjöldum + handfarangursgjald: 64.991 kr.
Mismunur: 459 kr.


París með WOW air

Flug fyrir tvo m. sköttum og gjöldum + handfarangursgjald: 66.991 kr.


London með easyjet

Flug fyrir tvo m. sköttum og gjöldum. Handfarangur innifalinn: 67.695 kr.


Kaupmannahöfn með WOW air

Flug fyrir tvo m. sköttum og gjöldum + handfarangursgjald: 67.991 kr.

Upplýsingar um verð á flugi og tengd gjöld eru allar fengnar af vef Air Iceland, Dohop, WOW Air, SAS, Mytrip.com og Norwegian Air, fimmtudaginn 23. mars 2017. Vert er að benda á að verðið getur verið breytilegt frá degi til dags. Hér er miðað við tvo fullorðna einstaklinga sem ferðast einungis með handfarangur og inni í verðinu eru viðeigandi gjöld og skattar.

Viltu lesa meira? Þú getur strax lesið þessa grein og aðrar í heild sinni hér á DV.is með því að ýta á „Sjá meira“ og nýta þér hagstæða áskriftartilboð frá aðeins 928 kr. á mánuði.
Sjá meira »
Gleymt lykilorð?
Auglýsing