Tilbúni kjúklingurinn þykir skara fram úr
Tilbúinn matur er seldur í miklu magni í Costco. Grillaður kjúklingur er ódýrari í Costco en í öðrum verslunum í Bandaríkjunum og Bretlandi en óvíst er hvað verður verður hér. Þá hefur Costco frá því um miðjan níunda áratug síðustu aldar selt pylsu og gos á einn og hálfan dollara. Það eru innan við 180 krónur. Ef verðlagningin verður á svipuðu róli í Kauptúni, má gera ráð fyrir að þar fari ódýrasti skyndibiti landsins – fyrir meðlimi.
Eitt af því fyrsta sem lífsstílsfrömuðir á Youtube nefna við Costco er úrval af nýbökuðu brauði og bakkelsi. Þar er til dæmis hægt að fá nokkuð úrval af kökum og tertum fyrir afmælisveislur, án þess að panta þurfi með fyrirvara. Bakkelsið þykir mjög ódýrt í Costco, miðað við bandarískt verðlag, en eins og um svo margt annað er óvíst hvað þetta mun kosta í Costco hér heima. Ef til vill er verðlagið í öðrum Costco-verslunum þó vísbending um það sem koma skal hér.