Tríklósan finnst meðal annars í Colgate Total – Bandarísk yfirvöld banna notkun þess í sápu en ekki í tannkremi
Bandaríska matvæla- og lyfjaeftirlitið, FDA, bannaði í síðustu viku notkun á efninu tríklósan í sápum á bandarískum markaði. Þó að efnið hafi verið bannað í sápum er enn leyfilegt að nota það í tannkremi.
Bandaríska stórblaðið New York Times fjallaði um þetta í vikunni, en í frétt blaðsins kemur fram að forsvarsmönnum Colgate-Palmolive hafi tekist að sannfæra matvæla- og lyfjaeftirlitið um að að kostir þessa tiltekna efnis væru í raun fleiri en gallarnir. Og það þrátt fyrir að vísbendingar liggi fyrir um mögulega skaðsemi þess.
Colgate er einn stærsti tannkremsframleiðandi heims og er efnið að finna í einni tegund tannkrems frá fyrirtækinu, Colgate Total. Tríklósan er bakteríudrepandi, en jafnframt talið hormónaskarandi auk þess sem það er skaðlegt umhverfinu. Þá er efnið talið stuðla að fjölgun ónæmra baktería.
Forsvarsmenn Colgate sögðu að efnið stuðlaði að minni skánmyndun á tönnum og væri auk þess gagnlegt í baráttunni gegn tannholdsbólgu. Í röksemdafærslu bandaríska matvæla- og lyfjaeftirlitsins, vegna banns á notkun efnisins í sápum, kom fram að sápa sem inniheldur efnið sé ekki gagnlegri en sápa sem inniheldur það ekki. Þá geti langtímanotkun á efninu haft skaðleg áhrif á heilsu fólks.
Vísindamenn hafa löngum varað við notkun á efninu, meðal annars vegna þess að rannsóknir benda til þess að efnið geti stuðlað að fjölgun sýklaónæmra baktería. Forsvarsmenn Colgate segja aftur á móti ekkert bendi til þess að efnið í umræddu tannkremi sé skaðlegt mannfólki.
Sitt sýnist hverjum um þessa ákvörðun lyfja- og matvælaeftirlits Bandaríkjanna. Einn þeirra sem hefur gagnrýnt stofnunina er Rolf Halden, sérfræðingur við Arizona State University, sem meðal annars hefur stundað rannsóknir á tríklósan. Gagnrýnir hann að lítið samræmi sé í ákvörðun eftirlitsins.
„Við setjum sápu á hendurnar og það eru alltaf snefilefni sem geta komist inn í líkamann,“ segir hann. En þegar tannkrem sé annarsvegar eigi efni úr því mun greiðari leið inn í blóðrásina, þar á meðal efni eins og tríklósan.
