Bónus var með lægsta verðið á matarkörfunni þegar verðlagseftirlit ASÍ kannaði verð í lágvöruverðsverslunum og stórmörkuðum á höfuðborgarsvæðinu þann 13. júní síðastliðinn.

Matarkarfan ódýrust í Bónus

Matarkarfan var ódýrust hjá Bónus á 19.747 krónur en dýrust hjá Hagkaupum á 22.642 krónur sem er 2.895 krónu verðmunur eða 15 prósent.

Hvað einstaka vörur varðar var minnstur verðmunur á mjólkurvörum eða um 20 prósent. Oftast var fjórðungs til helmings verðmunur á hæsta og lægsta verði á milli verslana.

Eins og áður segir var verslunin Bónus með ódýrustu körfuna á 19.747 krónur. Næst kom verslunin Krónan með körfu sem kostar 437 krónum meira en Bónus-karfan. Því næst var Fjarðarkaup með körfu á 20.609 krónur sem er 4 prósent dýrari en karfan hjá Bónus en hjá Nettó kostaði karfan 21.204 krónur eða 7 prósent meira en í Bónus.

Matarkarfan var dýrust hjá Hagkaupum en þar var hún 15 prósent hærri en í Bónus. Karfan var 13 prósent dýrari hjá Iceland en í Bónus og hjá Samkaupum-Úrval var karfan 11 prósent dýrari. Matarkarfan samanstendur af 48 almennum neysluvörum til heimilisins t.d. mjólkurvörum, morgunkorni, grænmeti, kjöti, drykkjarvörum, ásamt ýmsum pakkavörum, dósamat og fleiru.

Hilluverðið tekið saman

Í könnuninni var skráð niður hilluverð vöru eða það verð sem neytandinn hefur upplýsingar um inni í búðinni að hann eigi að greiða fyrir vöruna.

Þegar skýrt er gefið til kynna að veittur sé afsláttur af merktu verði við kassa var skráð afsláttarverð. Til að auðvelda verðsamanburð er skráð mælieiningaverð vöru, þar sem pakkastærðir eru mismunandi eftir verslunum.

Könnunin var gerð á sama tíma í eftirtöldum verslunum; Bónus, Krónunni, Nettó, Fjarðarkaupum, Iceland, Nóatúni, Víði, Samkaupum Úrval og Hagkaupum.