Mikil verðhækkun í Reykjanesbæ – Dýrast í Reykjavík en ódýrast í Hafnarfirði
Miðaverð fyrir fullorðinn í sund í Reykjanesbæ hefur hækkað um 75 prósent síðan 2014. Þetta kemur í ljós þegar verð á sundstöðum er skoðað í dag og borið saman við verðkönnun sem DV gerði í apríl 2014. Dýrasti sundmiðinn á landinu er í Reykjavík þar sem stakur sundmiði fyrir fullorðinn kostar 900 krónur og hefur hækkað um 50 prósent milli kannana DV.
Á þeim sundstöðum á landsbyggðinni sem DV skoðaði er dýrasti staki sundmiðinn fyrir fullorðna á Akureyri og í Snæfellsbæ, eða á 750 krónur. En verðið hefur hækkað um 50% milli kannana í Snæfellsbæ. Ódýrasti staki sundmiðinn í athugun DV sem nær til 15 staða reyndist vera í Hafnarfirði. Stakur miði fyrir fullorðinn þar kostar 550 krónur.
Verðkönnun DV nú byggist á sambærilegri könnun og birtist í blaðinu 4. apríl 2014 þar sem verð var kannað á 22 stöðum, víðs vegar um landið. Að þessu sinni var verð á stökum miða fyrir fullorðna og börn sem og verð á 10 miða kortum fyrir fullorðna skoðað á 15 stöðum og hækkun á verði milli kannanna reiknuð í prósentum. Upplýsingar um verð eru fengnar af vefsíðunni sundlaugar.is og verð síðan staðfest á vefsíðum viðkomandi bæja og sveitarfélaga.
Athygli vekur að sundmiðinn í Reykjanesbæ var sá ódýrasti í könnun DV árið 2014, þegar fullorðinn komst í sund fyrir 400 krónur. Verðið í dag er 700 krónur sem er nær því sem gengur og gerist víðast hvar annars staðar, en fjarri því að vera það lægsta lengur.
Á sex af þeim fimmtán verðsvæðum sem DV skoðaði nú hafa sundmiðar fyrir fullorðna hækkað um 25 prósent eða meira milli kannana. Hækkun á sundmiðanum í Reykjavík milli kannana helgast einna helst af mikilli og umdeildri hækkun í október í fyrra þegar samþykkt var 38 prósenta hækkun á miðanum sem fór úr 650 krónum í 900 krónur. Var hækkunin útskýrð á þann veg að um væri að ræða lið í aðgerðaráætlun í fjármálum borgarinnar. Miðinn hafði kostað 600 krónur í könnun DV árið 2014.
10 miða sundkort fyrir fullorðinn einstakling er hvergi dýrara en í Kópavogi af þeim stöðum sem skoðaðir voru í könnun DV nú. Kortið þar kostar 4.900 krónur. Ódýrasta 10 miða kortið er á 3.700 krónur, í Mosfellsbæ og Reykjanesbæ.
Mismunandi er eftir sundstöðum á hvaða aldursbili þarf að greiða fyrir börn, sem og hvort öryrkjar og eldri borgarar fái frítt eða greiði barnagjald. Mesta hækkunin á stökum barnamiða milli kannana er í Hveragerði, þar sem verðið hækkaði um tæp 58 prósent.
Sundstaður | Fullorðnir | Hækkun | Börn | Hækkun | 10 miðar fullorðnir | Hækkun |
---|---|---|---|---|---|---|
Reykjavík | 900 | 50% | 140 (6-18) | 7,7% | 4.300 | 4,8% |
Reykjanesbær | 700 | 75% | 150 (10-15) | X | 3700 | 13,8% |
Hafnarfjörður | 550 | 10% | 140 (5-17) | 16,6% | 3.760 | 7,4% |
Kópavogur | 700 | 27% | 150 (10-17) | 0% | 4.900 | 22,5% |
Garðabær | 600 | 36% | 150 (11-17) | 20% | 3.900 | 11,4% |
Seltjarnarnes | 600 | 9% | 120 (6-18) | 0% | 4.000 | 14,2% |
Mosfellsbær | 650 | 14% | 150 (10-17) | 3,4% | 3.700 | 5,7% |
Hækkun miðast við verðkönnun DV sem birtist í blaðinu 4. apríl 2014.
Sundstaður | Fullorðnir | Hækkun | Börn | Hækkun | 10 miðar fullorðnir | Hækkun |
---|---|---|---|---|---|---|
Fjarðabyggð | 700 | 16,6% | 200 (6-17) | 0% | 4.000 | 8% |
Ísafjarðarbær | 590 | 7,2% | 300 (6-18) | 7,1% | 4.700 | 6,8% |
Akureyri | 750 | 36% | 200 | 0% | 4.600 | 4,5% |
Vestmannaeyjar | 600 | 20% | 190 (10-17) | 5,5% | 3.900 | 18,8% |
Snæfellsbær | 750 | 50% | 200 | 0% | 4.125 | 37,5% |
Fljótsdalshérað | 600 | 9% | 270 | 8% | 4.150 | 9,2% |
Fjallabyggð | 650 | 8,3% | 300 | 0% | 4.800 | 6,6% |
Hveragerði | 700 | 22,8% | 300 | 57,8% | 3.720 | 9,4% |
Hækkun miðast við verðkönnun DV sem birtist í blaðinu 4. apríl 2014.