Finnst þér rafhlaðan ekki endast nógu lengi í símanum þínum? Eflaust svara margir þessari spurningu játandi, sérstaklega þeir sem nota símann mikið og þurfa að setja hann í hleðslu einu sinni á dag.
Staðreyndin er sú að mörg smáforrit, eða öpp, éta upp rafhlöðuna í símanum þínum og gera það að verkum að hún endist skemur en ella. Eitt vinsælasta smáforritið í farsímum nú til dags er Facebook-appið sem um milljarður jarðarbúa notar.
Í prófun sem breska blaðið Guardian framkvæmdi kom í ljós að með því að eyða Facebook-appinu og notast þess í stað við Facebook í vafra, til dæmis Safari-vafranum, var hægt að lengja rafhlöðuendingu símans um fimmtán prósent. Þetta er hægt bæði á Android-símum og símum með iOS-stýrikerfinu sem Apple notast við.
Undir lok síðasta árs bentu sérfræðingar í upplýsingatækni á að Facebook-appið krefjist talsverðrar orku jafnvel þó forritið sé ekki í notkun. Forsvarsmenn Facebook sögðust meðvitaðir um vandamálið og unnið væri að lagfæringu. Þrátt fyrir fögur fyrirheit er enn hægt að lengja líftíma hverrar hleðslu umtalsvert með því einu að eyða appinu.
Facebook-fíklar sem ekki geta verið án appsins geta farið aðrar leiðir til að lengja líftíma rafhlöðunnar. Skjárinn, eða öllu heldur birtan í skjánum, notar mikla orku og með því einu að minnka birtustigið er hægt að spara rafhlöðuna. Þá er hægt að loka forritum sem ekki er verið að nota. Það er hægt á iPhone-símum með því að smella tvisvar á miðjutakkann og draga appið sem er opið upp. Loks má geta þess að hægt er að slökkva á þráðlausa netinu og ekki láta símann titra þegar hann hringir eða móttekur skilaboð.