ELKO segist hafa þurft að fá vélarnar með flugi vegna mikillar eftirspurnar – 10% tollur er lagður á leikjatölvur en það breytist um áramót
Playstation 4 pro, nýjasta leikjatölvan úr smiðju Playstation, er mun ódýrari í öllum nágrannalöndum Íslands – þar á meðal Færeyjum – en á Íslandi. Verðmunurinn á tölvunni í stærstu raftækjaverslun Íslands, ELKO, og í Þýskalandi, Noregi, Svíþjóð, Danmörku, Færeyjum og Bretlandi er á bilinu 21-47%. Tíu prósent tollur er á leikjatölvur á Íslandi en þær eru flokkaðar sem leikföng en ekki tölvur. ELKO segir að það skýri hluta verðmunarins.
DV hefur fjallað ítarlega um verðlag á Íslandi að undanförnu en kaupmenn hafa borið fyrir sig að smæð markaðar og hár sendingakostnaður spili stærstan þátt í því að verðlag hér er mun óhagstæðara neytendum en verðlag í nágrannalöndunum. Þá er gengisbreytingar gjarnan nefndar en gengi krónunnar hefur styrkst mjög að undanförnu.
Margir kaupmenn hafa bent á að mikið óhagræði felist í því að kaupa inn fá eintök af vörum í senn. Smásalar kaupi minna magn á hærra verði en stóru keðjurnar í Evrópu og það skýri nokkurn hluta þess verðmunar sem blasir við neytendum.
Í Færeyjum búa 49 þúsund manns. Nærri lætur að Íslendingar séu sjö sinnum fleiri, að ótöldum viðskiptavinum sem koma hingað sem ferðamenn. Engu að síður er Playstation 4 pro (1TB) 21% dýrari í ELKO en í Expert, sem er raftækjaverslun í verslunarmiðstöðinni SMS í Þórshöfn í Færeyjum. Vandséð er að Færeyingar panti meira magn en Íslendingar og þá er heldur ósennilegt að miklu muni á flutningskostnaði til eyríkjanna tveggja.
Playstation 4 pro kom á markað í nóvember svo gengisbreytingar hafa sáralitlar orðið síðan vélarnar voru keyptar til landsins.
ELKO er oft með lægsta verðið á raftækjum á Íslandi. Í Tölvutek er vélin þó ódýrari. Þar kostar hún 66.990 en það er 16% hærra verð en í Expert í Færeyjum. Á Heimkaup kostar vélin það sama og í ELKO. Þó samanburðurinn við Færeyjar komi illa út fyrir íslenskar raftækjaverslanir blasir meiri verðmunur við í öllum þeim löndum sem DV hefur skoðað.
DV hafði samband við ELKO og leitaði skýringa. Óttar Örn Sigurbergsson innkaupastjóri segir í svari til DV að ELKO kaupi Playstation af innlendum dreifingaraðila. Verðið sveiflist í takt við flutningsmáta sem og gengi. Hann hefur eftir dreifingaraðilanum að vegna þess að innflutningur vélanna þoldi ekki bið, og vegna þess að eftirspurnin reyndist meiri en gert var ráð fyrir, hafi þurft að flytja vélarnar til landsins með flugi. Það sé mun dýrari flutningsmáti en þegar skip eru notuð. Flugið kosti þrisvar til fjórum sinnum meira. „Gert er ráð fyrir öllum flutning inn í verð til okkar.“ Hann segist ekki vita hvernig Færeyingar flytji inn sína vöru.
Hann segir líka að Ísland sé eina landið þar sem Playstation tölvur séu tolllagðar. Þess má geta að tollurinn fellur niður eftir tvær vikur en Bjarni Benediktsson fjármálaráðherra sagði í þætti hjá Gísla Marteini á RÚV í gærkvöldi, að tuga prósenta verðmunur á Íslandi og í útlöndum væri óeðlilegur. Búið sé að afnema marga tolla og næstum öll vörugjöld. Skrefið verði stigið til fulls um áramótin – ef frá eru taldar nokkrar tegundir af matvöru.
Óttar segir við DV að Ísland sé örmarkaður. „Ennfremur er Ísland örmarkaður þar sem Playstation er allsráðandi og þykir mér ekki ótrúlegt að framleiðandi hafi augun annars staðar þegar þarf að styðja við markaði þar sem Xbox vélarnar eru í samkeppni.“
Hann segir ELKO vinna eftir strangri verðstefnu og að álagning á vélunum hafi verið í lágmarki. Hann segir að fyrirtækið fagni öllum verðkönnunum. „ELKO er iðulega að endursemja um verð og er Playstation þar engin undantekning. Við erum búnir að hafa samband við dreifingaraðila á Íslandi til að ræða nánar verðlagningu.“
Hann bendir loks á að vélin sé uppseld í augnablikinu en býst við því að sendingin sem berist í næstu viku verði á betra verði.
