Britax Advansafix barnabílstóll er mun dýrari á Íslandi en í nágrannalöndunum. Stóllinn er meira en tvöfalt dýrari hér en í Bretlandi og munurinn á Íslandi og Danmörku er 40 þúsund krónur. Þetta sýnir verðsamanburður DV.
Snorri Ólafur Jónsson hjá Fífu segir gengisbreytingar gera fyrirtækinu erfitt að bjóða upp á verð sem standist verði í nágrannalöndunum snúning. Ef miðað sé við gengi pundsins eins og það var í vor, 185 krónur, þá kæmi samanburðurinn miklu betur út. Hár flutningskostnaður sé ekki til þess að bæta ástandið.
Hann segir að í tilfelli þessarar vöru sé Fífa endursöluaðili en ekki umboðsaðili. „Þar af leiðandi erum við ekki að fá besta verðið hjá þeim.“ Til að fá hagstæðari verð þyrfti Fífa að kaupa vörurnar í ákveðnu lágmarksmagni og því nái verslunin ekki nema í örfáum vöruflokkum. „Laun og tengd gjöld eru líka hærri hérlendis en víða er í Evópu.“
Hann segir að hvað samanburð við Bretland áhræri muni miklu um að þar sé virðisaukaskattur á barnabílstóla 5% en hér sé hann 24%. Snorri segir að markaðurinn í Bretlandi sé skakkur vegna gengisfalls pundsins en það muni breytast á nýju ári þegar búðir fara að kaupa vörur á nýju gengi pundsins.
„Við höfum verið að lækka verð á mörgu hjá okkur undanfarið þegar nýjar sendingar hafa verið að detta í hús og fylgjumst líka vel með hvað sé að gerast hvað verð áhrærir í löndum í kringum okkur.“