Rannsóknir sem gerðar voru á aloe vera geli sem selt er í nokkrum af stærstu verslunarkeðjum Bandaríkjanna leiddu í ljós að í einhverjum tilfellum fannst ekki snefill af aloe vera plöntunni í þeim.

Það var Bloomberg-fréttastofan sem fékk rannsóknarstofu til að prófa tilteknar aloe vera vörur frá Walmart, Target og CVS. Leitað var eftir þremur lykilefnum sem gefa til kynna tilvist aloe vera plöntunnar í vörunum. Það sem hins vegar fannst var efnið maltoextrin, sem er mun ódýrara efni og stundum er notað í staðinn fyrir aloe vera.

Prófanir á aloe vera geli frá Walgreens leiddu í ljós tilvist eins þessara efna, eplasýru, sem sérfræðingar segja þó að sé ekki nóg til að staðfesta að gelið sé unnið úr aloe vera plöntunni. Á öllum vörunum var plantan listuð sem annað hvort fyrsta eða annað innihaldsefni, á eftir vatni.

Aloe vera birgja Vestanhafs hafa véfengt niðurstöður rannsóknarinnar, meðal annars Fruit of the Earth og í yfirlýsingu frá CVS og Walmart segjast keðjurnar báðar standa með birgjum sínum. Target vildi ekki tjá sig um málið og vísaði í yfirvofandi málshöfðun vegna umfjöllunarinnar.

Aloe vera hefur verið notað í árþúsundir vegna græðandi eiginleika plöntunnar. Joe Barrie, einn forsvarsmanna AloeCorp, eins stærsta aloe vera púðurbirgja Bandaríkjanna, segir að verðlagning margra keppinauta hans sé grunsamleg. Þeir geti í einhverjum tilvikum boðið helmingi lægri verð en AloeCorp sem þó bjóði lág verð og gefur í skyn að það sem keppinautarnir selji bara alls ekki aloe vera púður- sem notað er í gelið.

Bendir hann á að það taki hátt í hundrað kíló af aloe vera laufum til að framleiða hálft kíló af púðri. Allt sé þetta gert með höndum og framleiðslan því bæði dýr og krefjist mikils mannafla.