Öll flugfélög í heiminum eru með töskumátara
Undanfarinn sólarhring hafa margir deilt og sett „like“ á færslu á Facebook þar sem kona gagnrýnir WOW air fyrir að farþegar þurfi að setja handfarangur í svokallaðan tösku-mátara. Ef taskan passar ekki þá þurfi viðkomandi að reiða fram 5000 krónur.
Þá segir í færslunni að með þessu hafi WOW air tekið upp nýjar reglur til að ná í peninga farþega sinna.
Svanhvít Friðriksdóttir, upplýsingafulltrúi WOW air, segir í samtali við DV að reglurnar séu síður en svo nýjar af nálinni. Það sé hinsvegar hárrétt að handfarangur farþega þurfi að passa í farangurshólfið sem eru fyrir ofan sætin í vélinni.
„Svo farþegar geti verið vissir um að hann passi þá eru þessir „tösku-mátarar“ til staðar bæði við innritunarborðin sem og við brottfararhliðið.“
Svanhvít segir að öll flugfélög í heiminum séu með svona mátara.
„Þetta er öryggisatriði þar sem farangurshólfin taka bara ákveðna stærð af farangri,“ segir hún og bætir við að ef handfarangurinn passar ekki inn í vél þá er hann færður í farangurgeymslu vélarinnar.
„Þar sem við erum lággjaldaflugfélag þá rukkum við sérstaklega fyrir innritaðan farangur. Þess vegna þarf fólk að greiða 5000 krónur fyrir töskuna ef hún of stór til að passa í farþegarýmið.“
Þá segir á heimasíðu WOW air að hver gestur megi hafa með sér eina tösku í handfarangur.
Innifalið í flugmiðanum er ein lítil handfarangurstaska að hámarki 42x32x25cm (10kg) með handfangi og hjólum.
EÐA
Hægt er að kaupa farangursheimild fyrir stóra handfarangurstösku að hámarki 56x45x25cm (12kg) með handfangi og hjólum.
Jafnframt má hafa meðferðis einn lítinn hlut til persónulegra nota s.s. fartölvu, myndavélatösku eða litla handtösku, að hámarki 42x20x20cm, sem verður að komast fyrir undir sæti fyrir framan. Auk þess er leyfilegt að hafa meðferðis fríhafnarpoka í vélina.