Beyoncé og Jay-Z á leið til landsins

Nútíminn segir Jay-Z ætla að halda upp á afmælið sitt á Íslandi

Jay-Z heldur upp á 45 ára afmælið sitt á næstu dögum.
Á leið til landsins Jay-Z heldur upp á 45 ára afmælið sitt á næstu dögum.
Mynd: Reuters

Hjónin Jay-Z og Beyoncé Knowles eru væntanleg til landsins. Rapparinn ætlar að halda upp á afmælið sitt hér á landi ásamt eiginkonu sinni og vinum þeirra hjóna. Frá þessu greinir Nútíminn.

Heimildir vefmiðilsins herma að hjónin lendi í einkaþotu á Reykjavíkurflugvelli á næstu dögum og dvelji á Íslandi í tæpa viku. Þau verða með íslenska leiðsögumenn á meðan á dvölinni á Íslandi stendur ásamt því að vera með íslenska öryggisgæslu að hluta. Lífverðir hjónanna verða með í för.

„Eftir því sem Nútíminn kemst næst munu þau koma víða við á Íslandi og til stendur m.a. að þau fljúgi yfir eldgosið í Holuhrauni. Þá verður slegið upp afmælisveislu fyrir Jay-Z sem verður 45 ára fimmtudaginn 4. desember. Heimildir Nútímans herma að vinir hjónanna fagni afmælinu með þeim,“ segir í fréttinni.

Þá er einnig sagt að hjónin komi til með, á einhverjum tímapunkti, að dvelja á ferðamannastaðnum The Trophy Lodge í Úthlíð. Erfitt er að finna meiri lúxus á Íslandi en staðurinn er í eigu Jóhannesar Stefánssonar í Múlakaffi.

Þetta verður ekki í fyrsta skipti sem Beyoncé og Jay-Z koma til landsins. Þau millilentu á Keflavíkurflugvelli í janúar árið 2008 og gistu þá á Hótel Keflavík. Einhverjir íbúar í Reykjanesbæ hittu þau á írska barnum Paddy’s en þar horfðu hjónin á leik Dallas Cowboys og New York Giants í úrslitakeppni bandarísku NFL-deildarinnar í ameríska fótboltanum.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.