Adele ólétt

Söngkonan Adele hefur staðfest að hún á von á barni með kærasta sínum Simon Konecki. Staðfestingin var sett á heimasíðu söngkonunnar á föstudag. Stuttu eftir að tilkynningin var birt hrundi vefsíðan undan álagi.

„Það er mér sönn ánægja að tilkynna að við Simon eigum von á okkar fyrsta barni saman,“ sagði Adele í tilkynningunni. „Ég vildi að þið fenguð fréttirnar frá mér. Augljóslega erum við himin lifandi og spennt en vinsamlegast virðið einkalíf okkar á þessum yndislegu tímum,“ bætti hún við.

Ekki liggur fyrir hvenær von er á barninu.

Adele er ein af vinsælustu söngkonum heims í dag og en hún vann til sex Grammy-verðlauna fyrir nýjustu plötuna sína. Meðal annars fékk hún verðlaun fyrir plötu ársins.