Bæjar- og tónlistarhátíðin Hjarta Hafnarfjarðar fer fram í annað sinn dagana 29. ágúst til 2. september. Eins og nafnið gefur til kynna er hátíðin haldin í miðbæ Hafnarfjarðar og þjónar Bæjarbíó, tónlistarhús bæjarbúa þar lykilhlutverki.
Ólíkt öðrum hátíðum þá samanstendur Hjarta Hafnarfjarðar ekki af einni risastórri dagskrá þar sem áhugasamir verða að kaupa sig inn á alla dagskránna heldur kaupa gestir sig inn á einstaka, vandaða tónlistar viðburði sem hver og einn velur eftir sínum smekk.
Hátíðin stendur í fimm daga og mun einvalalið tónlistarfólks skemmta hátíðargestum. Meðal þeirra sem koma fram eru Agent Fresco, Björgvin Halldórsson og hljómsveit, Bjartmar Guðlaugsson, Blúsmenn Andreu og Hjálmar. Auk þess koma fram fjöldi annarra listamanna sem verða tilkynntir síðar.
Veitingar í boði á Hjartatorginu
Tónleikarnir fara eins og áður kom fram, allir fram inn í Bæjarbíó en á Hjartatorginu fyrir aftan Bæjarbíó og Ráðhúsið verða svæði þar sem hægt er að slappa og hitta aðra hátíðargesti. Þar verður boðið upp á veitingar frá nokkrum af bestu veitingastöðum bæjarins en þeir eru orðnir fjölmargir í bestu röð á landsvísu. Þar verður einnig stórt útijald og borðaðstaða fyrir alla að njóta.
Notting Hill Íslands
Miðbær Hafnarfjarðar hefur síðustu misseri að taka á sig mynd „gourmet“matargerðar og menningar. Fyrir voru í Hafnarfirði mörg einstaklega vel heppnuð veitinga- og kaffihús og dugir þar að nefna Súfistann, brautryðjanda kaffihúsamenningar á Íslandi, fiskveitingastaðinn Tilveruna og svo VON sem opnaði í suðurenda miðbæjarins í fyrra. Þá hafa bæst við einstök kaffihús eins og Pallet í suðurendanum og kaffihúsin Brikk og Norðurbakkinn í norðurenda miðbæjarins. Þá opnaðu veitingastaðurinn KRYDD í Hafnarborg um daginn og er þar um að ræða enn eina rósina í hnappagat miðbæjarins og þannig má segja að miðbærinn iði af matarmenningu þessa daganna.
Bæjarbíó er svo einskonar miðja í þessu þegar kemur að menningarlífinu því það má hæglega fullyrða að Bæjarbíó, þetta litla fallega tónlistarhús, sé næst duglegasta tónlistarhús borgarinnar þegar kemur að lifandi tónlist. Götulistaverk bæjarins ramma þetta skemmtilega inn og setja alþjóðlegan svip á umhverfið sem gerir miðbæ Hafnarfjarðar enn fallegri heim að sækja.
Miðbærinn iðar svo allur af litlum fallegum handverksverslunum og hönnunarbúðum og það væri að æra óstöðugan að ætla að telja það allt upp hér sem hægt er að finna í Strandgötunni til að skoða og skemmta auganu kjósi fólk að sækja Hafnarfjörð heim á hátíðina. Síðan er ein örfárra bókabúða sem ennþá er rekin í borginni á miðri Strandgötunni og þaðan hafa gárungarnir dregið sér það leyfi að kalla miðbæ Hafnarfjarðar Notting Hill Íslands. Það má því ljóst vera að heimsókn á bæjar- og tónlistarhátíðina Hjarta Hafnarfjarðar verður eitthvað alveg einstakt fyrir matar og tónlistarhjartað.
Allar nánari upplýsingar um dagskrána og annað sem vert er að vita er að finna á Facebooksíðu og heimasíðu Bæjarbíó.
