Árleg Vorgleði Gullkistunnar verður á Kringlukránni um helgina, föstudags- og laugardagskvöld. Þar munu félagarnir í Gullkistunni stíga á svið ásamt góðum gestum og skemmta gestum með gullaldartónlist.

„Þetta er sjöunda árið í röð hjá okkur,“ segir Óttar Felix Hauksson. „Það er regla hjá okkur að fyrstu helgina í maí er vorgleði, þá er páskahretið búið.“

Gullkistuna ásamt Óttari Felix skipa Gunnar Þórðarson, Ásgeir Óskarsson og Jonni Ólafs. Sérstakir heiðursgestir á laugardagskvöld eru Magnús Kjartansson og Birgir Hrafnsson.

„Það eru alltaf góðir gestir hjá okkur, í fyrra var Björgvin Halldórsson og það er topp aðsókn hjá okkur. Fólk á öllum aldri sem hefur gaman af sígildri 60´s tónlist, Bítlunum og fleiri góðum, en það eru margir sem heillast af þeirri tónlist.“

Magnús Kjartanson lék með Gunnari Þórðarsyni í hljómsveitinni Trúbrot og er einn af okkar ástsælustu dægurlagahöfundum. Hann samdi meðal annars Lítill drengur, To be grateful og My friend and I. Birgir Hrafnsson lék með Gunnari Þórðarsyni í Hljómum sumarið 1973 auk þess að hafa leikið með Pops, Ævintýri, Svanfríði og fleirum.