Sigrún Dóra Jónsdóttir, sem meðal annars er þekkt fyrir baráttu sína fyrir hag heimilislausra, hefur sent frá sér fallegt lag með Labba úr Mánum og syni hans Bassa. Lagið Blámann má hlýða á í spilaranum hér að neðan en um tilurð þess og upptökunnar segir Sigrún Dóra:

„Ég var heimilislaus og hef upplifað ýmislegt mótlæti. Vegna baráttu minnar fyrir heimilislausa kynntist ég Einari Erni og stóðum við að tónleikum í Laugardalnum til styrktar þeim sem hvergi eiga heima. Ég sagði Einari frá draumi mínum um að gefa út eitt lag. Ég söng í hljómsveitum þegar ég var unglingur og hef varla gripið í míkrafón frá því ég var tvítug. Alltaf blundaði þessi draumur í mér. Ég er svo lánsöm að hafa þekkt til Labba (í Mánum) sem á og rekur eitt fullkomnasta stúdíó landsins og leitaði til hans með að aðstoða mig við að láta drauminn rætast.

Hafði ég þá í huga að taka bara upp eina ábreiðu af einhverju lagi, bara að upplifa það að syngja í stúdíói og eiga fyrir börnin mín og afkomendur. Einar Örn settist þá niður og sló í þetta lag fyrir mig, tók ekki í mál að ég tæki ábreiðu. Hann hafði oft látið sig sjálfur dreyma um að semja einfalt lag sem væri eins út í gegn og það tókst honum þarna. Einfaldleikinn er það sem einkennir lagið og ætti það að vera öllum auðvelt sem spila á hljóðfæri að grípa í og spila.

Textann samdi ég sjálf og er hann skírskotun í fegurðina sem alltaf er hægt að finna í lífinu og huggunina sem felst í því að ég get verið hvar sem er og með hverjum sem er þegar ég loka augunum á kvöldin. Að elska er aldrei neikvætt sama þó ástin kulni eða sé jafnvel ekki gagnkvæm. Nóttin geymir þá sem við viljum að hún geymi og við eigum að vera sátt við okkar hlut í lífinu með því að finna fallega staðinn í huga okkar.

Von mín er sú að sem flestir njóti. Textinn fylgir með í myndbandinu svo allir geta sungið og glaðst með mér.