„Ég fæddist í Serbíu en ólst upp í Kanada. Foreldrar mínir notuðu tónlist til að hjálpa mér og systur minni að tengjast uppruna okkar. Mín uppáhaldstónlist frá Serbíu er því þjóðlög sem voru og eru enn sungin án undirleiks. Þau lýsa hrynjandi lífsins í sveitinni, ungri ást, og auðvitað sorg,“ segir tónlistarkonan Jelena Ćirić, en hún hefur búið og starfað á Íslandi í rúmlega eitt og hálft ár.
„Marijo, deli bela kumrijo“ (ísl. María, hvíta dúfa) er eitt þannig lag sem ég elska vegna fegurðar þess, en líka sögu. Það segir af óendurgoldinni ást sem tyrkneskur höfðingi ber til ungrar þorpsstúlku, en sjálf saknar hún eigin ástmanns sem er í burtu að berjast í stríði. Lagið vefur saman sögu svæðisins og persónulegu drama, og við bætist 7/8 takttegundin (sem heyrist ekki oft vestan Balkanskagans) sem gefur laginu sérstakan lit og balkanskan blæ. Teofilovic-bræðurnir eru á meðal margra sem flutt hafa lagið, og ég mæli sterklega með þeim fyrir hjartnæmar túlkanir á serbneskri þjóðlagatónlist.“
[youtube https://www.youtube.com/watch?v=Ti60R_iNJPc]
Meiri tónlist að heiman:
Ákall um frið – Najmo Fyasko mælir með tónlist frá Sómalíu.
„Eins manns kjöt er annars manns eitur“ – Nonykingz mælir með tónlist frá Nígeríu.
Rödd kvenna – Fatima Hossaini mælir með tónlist frá Afganistan.
Baráttusöngur fyrir frelsinu – Ronald Fatalla mælir með tónlist frá Filippseyjum.
