Menning

Metsöluhöfundurinn Iain Reid, yngri bróðir frú Elizu Reid heldur útgáfuhóf í Reykjavík

Ragna Gestsdóttir skrifar
Föstudaginn 13. apríl 2018 15:30

Nýlega kom fyrsta skáldsaga kanadíska rithöfundarins Iain Reid út hjá Veröld í þýðingu Árna Óskarssonar.

Reid, sem búsettur er í Kanada, er yngri bróðir frú Elizu Reid forsetafrúar okkar.

Reid hefur áður gefið út æviminningar sínar í tveimur bókum: A Year in the Life of an Over-Educated, Underemployed, Twentysomething Who Moves Back Home (árið 2010) og The Truth About Luck: What I Learned on my Road Trip with Grandma (árið 2013).

Ég er að spá í að slútta þessu er hins vegar fyrsta skáldsaga hans og kom hún út í heimalandinu árið 2016.

Frú Eliza er stofnandi ritlistarbúðanna Iceland Writers Retreat, ásamt Ericu Green, en þær fara fram í Reykjavík núna 11. – 15. apríl.

Höfundurinn er staddur hér á landi og verður haldinn útgáfufagnaður í Eymundsson Austurstræti mánudaginn 16. apríl kl. 17.

Bókin fjallar um Jake og kærustu hans sem heimsækja foreldra hans sem búa á frekar afskekktum bóndabæ. Ýmislegt sérkennilegt mætir unnustunni í þessari ferð og sú mynd sem hún hafði af Jake rímar illa við það sem hún upplifir. Á heimleiðinni lenda þau í blindbyl sem ber þau að auðri skólabyggingu þar sem atburðarásin tekur óvænta stefnu.

Bókin hefur slegið rækilega í gegn víða um heim og leikstjórinn Charlie Kaufman, sem tilnefndur hefur verið til Óskarsverðlauna, vinnur nú að mynd eftir sögunni, sem Notable Books Council valdi sem skáldsögu ársins.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af