Í gær gaf rappsveitin Rari Boys út nýtt lag og myndband, Önnur tilfinning, en sveitina skipa sex ungir menn og hyggjast þeir vinna áfram að nýju efni og gefa út plötu fyrir sumar.
„Tónlistin byrjaði sem hobbý, en því meiri alvara sem verður úr henni, því betra,“ segir Ísleifur Eldur Illugason, einn af meðlimum Rari Boys. Auk hans skipa sveitina þeir Funi sem rappar í laginu, Andri, Dagur, Gabríel og Máni, allir eru þeir fæddir 1999 og eru í skóla. Rari Boys hafa hreiðrað um sig í æfingahúsnæði í kjallara við Suðurlandsbraut og æfa þar öllum stundum.
„Sveitin hefur verið í mótun í tæpt ár, en síðan í september, október hafa hlutirnir verið að gerast af alvöru,“ segir Ísleifur og svarar því til að allir vilji þeir gera tónlistina að ævistarfi.
Þeir spiluðu tvisvar á Hressó á Airwaves við góðar viðtökur.
„Önnur tilfinning er lýsandi fyrir það hvernig tónlist við viljum spila, lýsandi fyrir hvernig við ætlum að hljóma, enda fyrsti singleinn af væntanlegri plötu.“
„Á döfinni er að spila eins mikið og hægt er, vinna að nýju efni og vonandi gefa út plötu fyrir sumar,“ segir Ísleifur. „Það er líka samstarf á leiðinni með stórum nöfnum.“
[youtube https://www.youtube.com/watch?v=T6Y_wkvCsKM&w=560&h=315]