History inniheldur fimm lög
Hljómsveitin The Retro Mutants sendir í dag frá sér sína aðra plötu, smáskífu sem inniheldur fimm lög. Platan ber nafnið History og er tónlistin lituð af 80‘s tímabilinu.
„Við gáfum út okkar fyrstu plötu í fyrra við góðar undirtektir og við erum sannfærðir um að fólk verði ekki svikið ef það fílaði okkar fyrstu plötu,“ segir Bjarki Ómarsson.
„Tónlistin og hljóðheimurinn í tónlist okkar endurspeglar svoldið 80´s tímabilið og við vonum að þessi „Cult’“ tónlistarstefna eða „Synthwave / Retrowave’“ fari stækkandi hér á landi. Það má segja að þessi tónlistarstefna hafi orðið til út frá myndinni Drive þar sem sú mynd startaði svona einhverju nostalgíuæði sem hefur bæði smitast yfir á sjónvarpsskjáinn og yfir í höfuðið á þeim sem semja tónlist fyrir sjónvarp. Kung Fury og Stranger things eru ágætis dæmi sem hafa aldeilis slegið í gegn.“
Hljómsveitin, sem var stofnuð í byrjun 2017 af þeim Bjarka og Viktori Sigursveinssyni, kom fram opinberlega á Iceland Airwaves off venue við góðar undirtektir og eru þeir að spila á Secret Solstice hátíðinni í sumar.
„Við hlökkum til að spila fyrir hátíðargesti Secret Solstice í sumar,“ segir Bjarki.
Það er ýmislegt annað á döfinni hjá The Retro Mutants, svo sem tónlistarmyndband og fleiri tónleikar. „Svo við hvetjum sem flesta til þess að finna okkur á Instagram, Twitter og Facebook og fylgjast með, segir Bjarki.
[youtube https://www.youtube.com/watch?v=h6-R-oiXsfg&w=560&h=315]