Anna Júlía, Egill S., Hulda Vilhjálmsdóttir og Sigurður Guðjónsson tilnefnd fyrir sýningar sínar
Anna Júlía Friðbjörnsdóttir, Egill Sæbjörnsson, Hulda Vilhjálmsdóttir og Sigurður Guðjónsson eru tilnefnd til Íslensku myndlistarverðlaunanna, sem verða veitt í fyrsta skipti í Listasafni Reykjavíkur – Hafnarhúsi þann 22. febrúar næstkomandi. Verðlaunin verða afhent í tveimur flokkkum: myndlistarmaður ársins og svo sérstök hvatningarverðlaun.
Fimm manna dómnefnd valdi úr 70 tilnefningum sem bárust en listamennirnir eru tilnefndir fyrir sýningar sem settar voru upp árið 2017.
Anna Júlía Friðbjörnsdóttir er tilnefnd fyrir sýninguna Erindi í Hafnarborg, en í umsögn dómnefndarinnar segir að þar hafi Önnu Júlíu tekist að „samþætta fagurfræðilega og siðferðilega þætti listarinnar á áhrifamikinn hátt.“
Egill Sæbjörnsson er tilnefndur fyrir sýninguna Ùgh & Bõögâr Jewellery í i8 Gallery. „Sýningin í i8 er afsprengi viðamikillar sýningar í Feneyjum og saman mynda þær sannfærandi heild yfirgripsmikillar ádeilu á samtímann,“ segir í umsögn dómnefndarinnar.
Hulda Vilhjálmsdóttir er tilnefnd fyrir sýninguna Valbrá í Kling og Bang.
„Öll verkin búa yfir þunga og tjá allt í senn hættu og öryggi. Þau eru samtímis hrá og meitluð, öguð og kvik,“ segir í umsögn dómnefndarinnar.
Sigurður Guðjónsson er tilnefndur fyrir sýninguna Innljós í kapellu og líkhúsi St.
Jósefsspítala í Hafnarfirði. „Saman mynda myndbandsverkin heildstæða innsetningu í þessu óvenjulega sýningarrými svo úr verður magnað samlíf verka og rýmis,“ segir í umsögn dómnefndarinnar.
Dómnefnd verðlaunanna í ár er skipuð þeim Bryndísi Hrönn Ragnarsdóttur, myndlistarmanni (SÍM), Sigrúnu Hrólfsdóttur, deildarforseta myndlistardeildar Listaháskóla Íslands, Magnúsi Gestssyni, formanni Listfræðafélags Íslands, Margréti Elísabeti Ólafsdóttur, fulltrúa safnstjóra íslenskra safna og Margréti Kristínu Sigurðardóttur, formanni Myndlistarráðs.