María Kristín Jónsdóttir, ritstjóri HA, gerir upp menningarárið 2017
Í menningarannál ársins 2017 sem birtist í áramótablaði DV verður stiklað á stóru og rifjað upp það helsta sem átti sér stað í lista- og menningarheiminum á árinu sem er að líða. Leitað var til hóps álitsgjafa úr ýmsum kimum íslensks menningarlífs við gerð samantektarinnar. Daglega frá jólum og fram yfir þrettándann munu vangaveltur álitsgjafanna birtast í heild sinni á menningarsíðu DV.is. Þar líta þeir yfir árið, rifja upp það markverðasta og eftirminnilegasta í íslensku listalífi árið 2017 og greina stöðuna í menningunni í árslok.
Ritstjóri HA magasín.
Hvað var eftirminnilegasta listaverk eða menningarafurð ársins 2017?
Það fyrsta sem kemur upp í hugann er nýja vegglistaverkið á Réttarholtsskóla eftir Elínu Hansdóttur. Einfalt og sterkt verk sem fellur svo fallega að #metoo og #höfumhátt hreyfingunni sem hefur sýnt og sannað að lítil rödd getur haft mikil áhrif.
Ljóðræni gítarballettinn No tomorrow með Íslenska dansflokknum kemur næst upp í hugann. Virkilega fallegt og næmt verk með töfrandi og ögrandi sakleysi. Svo fór ég þrisvar á Guð mér líður svo illa í Hafnarhúsinu og hefði átt að fara oftar því sýningin var góð áminning um mátt endurtekningarinnar og jók á skynjun mína á fegurð rútínunnar og gerði mér gott. Sýning Egils Sæbjörnssonar í i8 var líka eftirminnilega falleg og ég <3 Out of Controll ilmvatnið mitt. Sýningin Dæmisögur – vöruhönnun á 21. öld á Kjarvalsstöðum veitti góða yfirsýn yfir fjölbreytileika fagsins hér á landi og vakti jafnframt athygli á virði hönnunar fyrir samfélagið í heild.
Hvað þótti þér markverðast í menningarlífinu á Íslandi á árinu?
Ráðning Sigríðar Sigurjónsdóttur í starf forstöðumanns Hönnunarsafns Íslands var mikil fengur fyrir hönnunargeirann enda hefur Sigríður verið mikilvægur hlekkur í íslensku hönnunarsenunni um árabil, meðal ananrs sem eigandi Spark Design Space, og ég tel að þarna komi kraftar hennar og sýn til með að nýtast faginu vel og færa safnið upp á næsta stig. Áherslubreytingar á meistaranámi í hönnun við Listaháskóla Íslands voru til góðs og ég hlakka til að fylgjast með þróun námsins á næstu misserum.
Letursmiðjan Or Type er að gera margt áhugavert og hannaði meðal annars leturtýpu sem er megineinkenni Arket – nýrrar konseptverslunar sem sænski risinn H&M opnaði nýlega. Þá opnuðu á árinu a.m.k. fjórar nýjar hönnunarverslanir í Reykjavík sem selja íslenska hönnun: Akkúrat, Ypsilon, Geysir heima og A . M . Concept Space. Sannarlega jákvæð þróun þótt enn vanti almennilegt sýningarrými fyrir hönnuði í höfuðborginni. Endurhönnun Marshall hússins breytti landslagi íslensku myndlistarsenunnar og öll sú framkvæmd var einstaklega vel ígrunduð og faglega útfærð enda hlaut verkefnið Hönnunarverðlaun Íslands árið 2017. Ég myndi vilja sjá svipaðan vettvang fyrir íslensku hönnunarsenuna verða til á allra næstu árum.
Hvað finnst þér hafa einkennt menningarlífið/ -umræðuna á Íslandi árið 2017?
Hugsjón, framtíðarsýn og raunsæi. Mér finnst hönnuðir hugsa stærra og til lengri tíma en oft áður. Það þarf stóran skammt af þolinmæði og seiglu til að starfa sem hönnuður á Íslandi og hvað þá að fara af stað með verkefni eða rannsókn án þess að vita hvort útkoman verði söluvara eða hvort niðurstaða fáist yfir höfuð.
Alltof oft hafa efnileg verkefni ekki fengið nægan tíma og fjármagn til að verða það sem þau gætu orðið en það er vonandi að breytast. Nýleg dæmi um áhugaverð hönnunarverkefni eru ilmbanki Nordic angan, Leit að postulíni og Genki instruments en þau eru meðal umfjöllunarefnis í 6.tbl. HA – tímarits um hönnun og arkitektúr sem ætti að vera til á öllum menningarheimilum landsins.