Segir skilið við útgáfubransann

Snæbjörn Arngrímsson selur Hr. Ferdinand til eins stærsta bókaforlags Danmerkur

Snæbjörn Arngrímsson vill ekki gefa upp hvað Politiken greiddi fyrir  útgáfufyrirtækið Hr. Ferdinand, en grínast með að það hafi verið „stórkostlega há upphæð.“
„Stórkostlega há upphæð“ Snæbjörn Arngrímsson vill ekki gefa upp hvað Politiken greiddi fyrir útgáfufyrirtækið Hr. Ferdinand, en grínast með að það hafi verið „stórkostlega há upphæð.“

Bókaútgefandinn Snæbjörn Arngrímsson hefur selt bókaforlagið Hr. Ferdinand og tengd fyrirtæki til Politikens Forlag, eins stærsta útgáfufyrirtækis Danmerkur. „Mér líður bara mjög vel með. Þetta er hárrétt ákvörðun á hárréttum tíma,“ segir Snæbjörn um söluna.

Snæbjörn stofnaði útgáfufyrirtækið Bjart árið 1990 en færði út kvíarnar til Skandinavíu á nýju árþúsundi. Hann seldi hlut sinn í Bjarti árið 2008 og einbeitti sér, ásamt eiginkonu sinni, Susanne Torpe, í kjölfarið að því að byggja upp danska systurfyrirtækið Hr. Ferdinand. Fyrirtækið hefur verið atkvæðamikið í Danmörku í útgáfu þýddra skáldverka eftir höfunda á borð við Dan Brown, Stephen King og Elenu Ferrante.

„Þetta er búið að vera í undirbúningi frá því í desember. Algjörlega upp úr þurru þá kom kona frá stóru erlendu forlagi í heimsókn og spurði hvort við værum til sölu. Við svöruðum að svo væri ekki en hún bað okkur um að hugsa málið, svo við gerðum það. Við höfum bæði verið í þessum bransa alla okkar starfsævi og við fórum að velta fyrir okkur hvort við ættum ekki bara að finna okkur nýtt sæti í leikhúsinu – ekki alltaf að sitja á sama stað,“ segir Snæbjörn. Eftir að ákvörðunin hafði verið tekin um að selja fyrirtækið fóru hjónin að líta í kringum sig og náðu góðum samning við danska útgáfurisann Politiken.

Voru það miklir peningar sem fengust fyrir fyrirtækið?
„Já, þetta var alveg stórkostlega há upphæð,“ segir Snæbjörn og hlær innilega en bætir svo við: „Nei, ég má ekki segja það.“

En hvað tekur við hjá þér þegar starfi þínu hjá Hr. Ferdinand lýkur?

„Það er að finna nýtt gott sæti. Ég hef ekki hugmynd um hvað ég ætla að gera. Ég læt það bara koma í ljós. En ég er harðákveðinn í því að nú muni ég prófa eitthvað annað en útgáfubransann.“

Árétting: Í prentútgáfu DV var rangt farið með stofnár bókaforlagsins Bjarts, en það var stofnað árið 1990.

Viltu lesa meira? Þú getur strax lesið þessa grein og aðrar í heild sinni hér á DV.is með því að ýta á „Sjá meira“ og nýta þér hagstæða áskriftartilboð frá aðeins 928 kr. á mánuði.
Sjá meira »
Gleymt lykilorð?
Auglýsing

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.