Rekinn eftir 27 ár með Simpsons-fjölskyldunni

Eftir að hafa verið hluti af teyminu á bak við Simpsons-fjölskylduna í 27 ár og komið að 560 þáttum er komið að leiðarlokum hjá Alf Clausen.

Er hættur eftir 27 ár með Simpsons-fjölskyldunni.
Alf Clausen Er hættur eftir 27 ár með Simpsons-fjölskyldunni.

Alf þessi var tónlistarstjóri þáttanna og allt frá annarri þáttaröð hefur hann séð um tónlistina. Síðasti þáttur hans, í tuttugustu og áttundu þáttaröðinni, var frumsýndur í maí síðastliðnum og reyndist það vera hans síðasti þáttur.

Í frétt Variety kemur fram að Alf hafi fengið þau skilaboð frá framleiðendum þáttanna að nú væri kominn tími á annarskonar tónlist. Forsvarsmenn Fox, sem framleiða þættina, hafa ekki tjáð sig um brottreksturinn. Ekki þykir þó loku fyrir það skotið að Fox hafi viljað spara.

Alla tíð hefur verið mikið lagt upp úr því að hafa góða tónlist í þáttunum. Þannig notaði Alf stóra, 35 manna hljómsveit í hverjum þætti og kostnaður við tónlistina og upptökur gat numið milljónum Bandaríkjadala á hverju ári.

Alf hefur á blómlegum ferli sínum hlotið 21 tilnefningu til Emmy-verðlauna og unnið til tveggja verðlauna. Líklega hafa fá ef einhver tónskáld fengið jafn margar Emmy-tilnefningar og hann. Ekki liggur fyrir hver tekur við starfi tónlistarstjóra Simpsons-þáttanna.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.