Grammyverðlaunahafinn, Emmy-verðlaunahafinn, sjónvarps- og kvikmyndastjarnam og ein fyndasta kona Bandaríkjanna, Kathy Griffin, verður með uppistand í Eldborgarsal Hörpu miðvikudaginn 29. nóvember næstkomandi.

Þetta er í fyrsta sinn sem Kathy fer í túr um heiminn, en ferðalagið hefst í október á Nýja-Sjálandi áður en hún heldur til Evrópu, Íslands þar á meðal. Sýningin heitir Laugh Your Head Off, en það er væntanlega vísan í umdeilda mynd sem Kathy birti í mars síðastliðnum. Þar sást hún halda á eftirlíkingu af blóðugu höfði Donalds Trump Bandaríkjaforseta, en myndin vakti hneykslun margra. Meðal annars sleit CNN samstarfi sínu við Kathy.

Á uppistandinu mun Kathy segja frá hinni umdeildu mynd og írafárinu sem fylgdi í kjölfarið.

„Ein mynd leiddi til þess að ég fékk boð úr öllum heimshornum. Og nú hlakka ég til að skemmta áheyrendum með því að segja þeim alla þessa fáránlegu en sprenghlægilegu sögu,“ segir Kathy í tilkynningu frá aðstandendum uppistandsins í Hörpu. Griffin heldur áfram: „Sýning mín er alls ekki fyrir viðkvæma og því ættu krakkarnir að vera heima. Mottóið mitt er „Funny First“ en hafiði engar áhyggjur því ég mun ekki hlífa nokkrum manni,“ en bætir síðan við, „en samt í fullri vinsemd“.

Miðasala hefst á harpa.is-tix.is og í síma 528 50 50 á föstudaginn klukkan 10.