Gjörningalistamaður var handtekinn í New York á sunnudag eftir að litlum glerkassa sem hann lá nakinn inni í var komið fyrir á rauða dreglinum í stjörnum prýddu galakvöldverðarboði Metropolitan-listasafnsins.

Slökkviliðsmenn þurftu að klippa gjörningalistamanninn, hinn 41 árs Fyodor Pavlov-Andreevich frá Rússlandi, úr kassanum og var hann í kjölfarið færður í fangaklefa þar sem hann var látinn dúsa í 22 klukkustundir. Í kjölfarið hefur hann verið kærður fyrir óspektir, ósiðsamlegt athæfi á almannafæri og fyrir að fara inn á lokað svæði í leyfisleysi.

Á Facebook-síðu Pavlov-Andreevich skrifar talsmaður listamannsins að hann hafi viljað sjá hvernig stofnunin myndi bregðast við óvirkum og saklausum kassa með listamanni inni í. „Jafnvel þótt öryggisvörðunum og lögreglumönnunum sem áttu í samskiptum við hann hafi fundist þetta fyndið, var hann engu að síður meðhöndlaður eins og raunverulegur glæpamaður vegna þess hversu fínn viðburðurinn var og vegna öryggisástandsins í landinu almennt.“

Pavlov-Andreevich hefur nokkrum sinnum áður komið sér fyrir nakinn í kassa og komið sér fyrir í fínum listheimsboðum í London, Sao Paulo, Moskvu og Feneyjum, en gjörningarnir eru hluti af seríu sem hann kallar Foundling – eða óskilabarn.

Íslendingum er flestum í fersku minni þegar listneminn Almar Atlason kom sér fyrir á Adamsklæðunum í gegnsæjum kassa í Listaháskóla Íslands og dvaldist þar í heila viku.

Fyodor Pavlov-Andreevich at MET GALA 2017 _ video by Lavoisier Clemente from .