Sigurður vinnur Maístjörnuna

Ljóðaverðlaun Rithöfundasambandsins og Landsbókasafnsins veitt í fyrsta skipti

Mynd: DV ehf / Sigtryggur Ari

Sigurður Pálsson hlýtur Maístjörnuna 2017, ný ljóðaverðlaun Rithöfundasambands Íslands og Landsbókasafns Íslands, fyrir ljóðabók sína Ljóð muna rödd, en verðlaunin voru afhent í fyrsta sinn á fimmtudag.

Þetta er sextánda ljóðabók Sigurðar og var hún meðal annars tilnefnd til íslensku bókmenntaverðlaunanna í flokki fagurbókmennta. Í umsögn dómnefndar um bókina segir meðal annars: „Í þessari bók birtist auðugur ljóðheimur Sigurðar Pálssonar, skálds sem hefur sannarlega lagt sitt fram til endurnýjunar og krafts íslensks ljóðmáls. Ljóð muna rödd er sterk bók þar sem glímt er við stórar spurningar. Röddin í titlinum er áleitin, ljóðin eru myndræn, tregafull og magnþrungin, en eru jafnframt óður til lífsins og lífsgleðinnar.“

Í dómnefnd sátu Ármann Jakobsson tilnefndur af Rithöfundasambandinu og Áslaug Agnarsdóttir tilnefnd af Landsbókasafni Íslands – Háskólasafni.

Lestu bókagagnrýni DV um Ljóð muna rödd: Frá fyrstu línu til þeirrar síðustu.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.