Han Kang og Jonas Hassen Khemiri meðal gesta á bókmenntahátíð

Bókmenntahátíð í Reykjavík fer fram í september

Han Kang (til hægri) ásamt enskum þýðanda bókarinnar The Vegetarian, eða Grænmetisætan, við afhendingu alþjóðlegu Man Booker-verðlaunanna 2016.
Margverðlaunuð Han Kang (til hægri) ásamt enskum þýðanda bókarinnar The Vegetarian, eða Grænmetisætan, við afhendingu alþjóðlegu Man Booker-verðlaunanna 2016.

Tilkynnt hefur verið hvaða erlendu rithöfundar muni taka þátt í Bókmenntahátíð í Reykjavík 2017 sem fer fram í september. Meðal gesta verða kóreski rithöfundurinn Han Kang, sem hlaut alþjóðlegu Man Booker-verðlaunin í fyrra fyrir bókina Grænmetisætan (k. 채식주의자), og sænski rithöfundurinn Jonas Hassan Khemiri sem sagður hefur verið einn mikilvægasti höfundur sinnar kynslóðar í Svíþjóð, en á dögunum kom bók hans Allt sem ég man ekki (e. Allt jag inte minns) út í íslenskri þýðingu.

Bókmenntahátíð í Reykjavík hefur verið haldin annað hvert ár frá 1985 og fara þá fram fjölbreyttir viðburðir á borð við upplestra, viðtöl, málþing, ráðstefnur og bókaball, en frítt er inn á alla viðburði.

Aðrir rithöfundar sem munu koma fram á hátíðinni eru meðal annars ísraelski rit- og handritshöfundurinn Etgar Keret, danska ljóðskáldið Maja Lee Langvad, sænska ljóðskáldið Aase Berg, finnski rithöfundurinn Tapio Koivukari, norðmennirnir Morten Strøksnes og Fredrik Sjöberg, danski rithöfundurinn Anne-Cathrine Riebnitzsky, bandaríkjakonan Yaa Gyasi sem á ættir að rekja til Gana, bandaríski sagnfræðiprófessorinn Timothy Snyder, breski rithöfundurinn og blaðamaðurinn John Crace, skoska ljóðkáldið Christine De Luca, indónesíski rihöfundurinn Eka Kuniawan, japanski rithöfurinn Hiromi Kawakami og Esmeralda Santiago frá Portó Ríkó.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.