Bandaríski rapparinn Young Thug kemur fram á tónleikum í Laugardalshöll 7. júlí næstkomandi. Það eru tónleikafyrirtækið Hr. Örlygur og Kronik sem standa fyrir tónleikunum og segja að fleiri listamenn muni koma fram á tónleikunum sem verði „sannkölluð rappveisla.“

Young Thug, eða Jeffrey Lamar Williams, er 25 ára rappari frá Atlanta í Georgíu í Bandaríkjunum. Hann vakti fyrst athygli í meginstraum bandarískrar rapptónlistar árið 2014 með lögunum Stoner og Danny Glover. Hann hefur verið sagður einn ófyrirsjáanlegasti og sérkennilegasti karakter í hip hop-heiminum í dag. Bæði rappstíllinn og fatastíllinn er einkennandi, en hann er oftar en ekki klæddur í kvenmannsföt og ögrar þannig stöðluðum hugmyndum um karlmennsku í rappheiminum.

Young Thug gaf út þrjár plötur á síðasta ári og komust þær allar ofarlega á vinsældalista í Bandaríkjunum. Platan Jeffrey sem kom út í ágúst var þá ofarlega á listum nokkurra virtra tónlistartímarita yfir bestu plötur ársins, þeirra á meðal Rolling Stone, Pitchfork og SPIN.

Miðasala hefstt á Tix.is fimmtudaginn 9. febrúar, en degi fyrr ef miðar eru keyptir í gegnum Aur-appið.