Ólafur F. Magnússon, læknir og fyrrverandi borgarstjóri, hefur undanfarin misseri einbeitt sér að tónlistarsköpun með góðum árangri. Ólafur frumsýnir í dag nýtt myndband við lag sem hann tileinkar minningu móður sinnar, Annellu Stefánsdóttur, sem lést þann 27. október síðastliðinn.
Lagið sem um ræðir heitir Þú landið kæra vernda vilt en lag og ljóð var upphaflega samið í skammdeginu á liðnu ári, nánar tiltekið þann 12. desember síðastliðinn. Texti lagsins hefst á ljóðlínunum „Ef úti niðamyrkur er og allt er orðið svart, þú herðir samt upp huga þinn, upphefur sinnið bjart.“
„Þessi texti í byrjuninni á einstaklega vel við þá hátíðlegu barokkútsetningu, sem Vilhjálmur Guðjónsson hefur gert við lagið og þá staðreynd, að móðir mín kvaddi áður en lagið kom út. Mér finnst eins og því hafi verið ætlað að vera minningarlag um móður mína,“ segir Ólafur í samtali við DV en móðir hans, Annella, verður jarðsungin á fimmtudag frá Dómkirkjunni.
Ólafur segir að alltaf hafi staðið til að taka lagið upp við altarisgluggana í Grafarvogskirkju, sökum hátíðleika lagsins. „En þegar til kom lagði kvikmyndatökumaður minn og vinur, Friðrik Grétarsson, mikið í lýsinguna við altarið, þar sem hann lætur myrkrið og ljósið takast á í bókstaflegri merkingu þeirra orða,“ segir Ólafur sem er mjög ánægður með lagið og myndbandið.
„Ég er þeirrar skoðunar að þetta sé magnað lag og ljóð en að kvikmyndataka og vel útfærðar hugmyndir Friðriks tengdar myrkrinu, ljósinu, dauðanum og trúnni á að bjartara sé framundan, geri þetta myndband einstakt og raunar að listaverki. Svo mikið er lagt í þetta einlæga og fallega myndband, að það hlýtur að skila hinu fallega lagi og ljóði og boðskap þess áfram – og að það muni lifa,“ segir Ólafur.
Myndbandið má sjá hér að neðan og texta lagsins svo þar undir en í myndbandinu má sjá fallega mynd af móður Ólafs frá yngri árum. „Það er helgi og hátíðleiki yfir henni, eins og öðru á myndbandinu,“ segir Ólafur að lokum.
Ef úti niðamyrkur er
og allt er orðið svart.
Þú herðir samt upp huga þinn,
upphefur sinnið bjart.
Þú þarft að tjá með orðum
þína’ líðan og hjartaslög,
því þannig koma ljóðin þín
og þannig fæðast lög.
Þú yrkja vilt þinn ástaróð
um allt sem þér er kært,
um móðurlandsins mold og blóð,
sem margir hafa sært.
Þú landið kæra vernda vilt
frá vargöld heimskunnar.
:Að lokum – er þér orðið skylt
að’ ei nema staðar þar.: