Lord of the Rings-sjónvarpsþættir í bígerð

Ian McKellen í hlutverki Gandálfs í Hringadróttinssögu.
Lord of the Rings Ian McKellen í hlutverki Gandálfs í Hringadróttinssögu.
Mynd: LOTR

Amazon hefur tryggt sér útgáfuréttinn að sjónvarpsþáttum sem verða byggðir á Lord of the Rings-þríleiknum. Talið er að samningurinn sé metinn á 250 milljónir Bandaríkjadala, 26 milljarða króna tæplega.

Þættirnir eru sagðir munu gerast fyrir atburðina í Lord of the Rings-bókunum en verða samt sem áður trúir sagnaheimi Tolkiens. Að sögn breska blaðsins Mirror er í samningnum einnig kveðið á um möguleikann á að gera svokallaða aukaafurð (e. spin-off).

Þetta eru sérstaklega góð tíðindi fyrir aðdáendur epískra fantasíuþátta enda munu hinir geysivinsælu þættir Game of Thrones hætta eftir sýningu áttundu seríunnar á næsta ári.

Amazon mun framleiða nýju þættina í samstarfi við Harper Collins-bókaútgáfuna og New Line Cinema-kvikmyndafyrirtækið.

Gera má ráð fyrir að þáttanna verði beðið með talsverði eftirvæntingu sé litið til velgengni Lord of the Rings-myndanna í leikstjórn Peters Jackson á fyrri hluta 21. aldarinnar. Talið er að þær hafi þénað tvo milljarða Bandaríkjadala auk þess að sópa að sér 17 Óskarsverðlaunum í það heila.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.