Risið upp frá dauðum

Óvenjulegir ástralskir verðlaunaþættir.
Glitch Óvenjulegir ástralskir verðlaunaþættir.

Ástralski myndaflokkurinn Glitch sem RÚV lauk nýlega við að sýna var bæði áhugaverður og spennandi. Söguþráðurinn hlýtur að teljast nokkuð óvenjulegur en nokkrir einstaklingar risu úr gröf sinni eins og ekkert væri og settu tilveru eftirlifandi í uppnám. Hinir upprisnu vissu ekki hvernig þeir höfðu dáið og mundu vart nöfn sín en smám saman áttuðu þeir sig. Einhverjir höfðu látist áratugum áður, aðrir höfðu ekki verið svo lengi neðan moldar. Á meðal hinna upprisnu var eiginkona sem látist hafði tveimur árum áður og mætti nú til að hitta eiginmann sinn en sá hafði ekki verið lengi að jafna sig og var komin með nýja konu sem var kasólétt. Hinni áður látnu eiginkonu var skiljanlega ekki skemmt. Þegar um sanna ást er að ræða þá á fólk að vera lengi að jafna sig en ekki þjóta í næsta samband við fyrsta tækifæri. Önnur eiginkona sem látist hafði áratugum áður hitti eiginmann sinn sem orðinn var fjörgamall og þjáður af Alzheimer. Ungur maður sem taldi sig hafa látist í stríði komst að því að saga hans var öðruvísi en hann hélt.

Einhver myndi kannski ætla að þáttur með söguþráð eins og þennan væri tóm þvæla en þættirnir einkennast af hugvitssemi og þar var allt afar vel gert. Þættirnir voru tilnefndir til fjölda verðlauna í heimalandinu og hlutu nokkur, þar á meðal sem besti dramaþátturinn.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.