Bandaríska útgáfan af The Voice vinnur reglulega til verðlauna enda með allra bestu raunveruleika- og keppnisþáttum sem völ er á. Sjónvarp Símans sýnir þættina og er hér með sent knús fyrir það. Það er gleði og húmor í þessum þáttum, en alvara lífsins kemur þar einnig til umræðu. Það gerðist til dæmis nýlega þegar sautján ára piltur steig á svið og söng undur fallega. Hann sagði þjálfurunum að hann hefði fyrst sungið opinberlega átta ára gamall í jarðarför eldri systur sinnar. Þetta hafði hann gert að eigin ósk.

Sögurnar sem keppendurnir eiga að baki vekja oft jafnmikinn áhuga og söngur þeirra. Sumir þeirra hafa hætt í öruggri vinnu til að sinna söngnum upp á von og óvon. Þátttaka í The Voice getur breytt miklu í lífi þeirra og því er gleðilegt þegar þeir komast áfram í keppninni og sárt þegar þeim er hafnað. Það hlakkar aldrei í þjálfurunum þegar þeir hafna keppendum, þeim finnst það leitt en í starfi eins og þeirra er ekki bara hægt að vera góður.

Söngkonurnar Miley Cyrus og Jennifer Hudson eru nýir þjálfarar í þáttunum. Miley er mikill æringi, sítalandi og á stöðugri hreyfingu. Hún er hressileg viðbót. Jennifer er öllu rólegri og mjög vinaleg. Adam Levine og Blake Shelton eru burðarstoðir þáttanna sem væru alls ekki jafn góðir án þeirra. Þeir eru eins og heima hjá sér, afslappaðir og skemmtilegir. Alltaf notalegt þegar stórstjörnur sýna að þær eru almennilegar manneskjur og haga sér ekki eins og frek dekurbörn.