John Berger er látinn 90 ára að aldri
John Berger, rithöfundur og einn áhrifamesti listgagnrýnandi samtímans, er látinn 90 ára að aldri. Hann er fæddur í London Í Bretlandi, byrjaði ferilinn sem myndlistarmaður en hóf síðar að kenna teikningu, skrifa og sinna listgagnrýni, fyrst fyrir dagblaðið New Statesman.
Berger er einna þekktastur fyrir sjónvarpsþáttaröðina Ways of Seeing sem sýnd var á BBC árið 1972 og samnefnda bók sem var gefin út samhliða þáttunum. Í þáttunum fjallar Berger um fagurfræði vestrænnar menningar, breytt hlutverk listarinnar í samtímanum og varpar ljósi á hugmyndafræðina sem dylst í listaverkunum. Ways of Seeing hafði gríðarleg áhrif í listheiminum og mótaði hvernig almenningur horfði á og nálgaðist myndlist.
John Berger var alla tíð marxisti og studdi ýmsar andspyrnu- og umbótahreyfingar. Þegar hann hlaut Booker-verðlaunin árið 1972 fyrir skáldsöguna G gaf hann helming verðlaunafésins til breska Black Panther-flokksins, byltingarflokks svartra. Hinn helming verðlaunafésins notaði hann til að sinna rannsóknum á farandverkafólki í Evrópu og kom út í bókinni A Sevent Man.
Berger bjó stærstan hluta ævi sinnar í Frakklandi og lést á heimili sínu í París í gær, mánudaginn 2. janúar.
Hægt er að horfa á fjögurra þátta röðina Ways of Seeing frá 1972 á Youtube.*