Bandaríski fjölmiðillinn The Hill heldur því fram að nýkjörinn bandaríkjaforseti, Donald Trump, stefni á að þurrka út öll framlög bandaríska ríkisins til styrktarsjóða lista (NEA) og hugvísinda (NEH) í landinu, og ætli þar að auki að einkavæða rekstrarfélög bandarískra almenningsfjölmiðla.

Niðurskurðurinn er sagður verða liður í tilraun ríkisstjórnarinnar til að minnka fjárútlát ríkisins um 10,5 þúsund milljarða dollara á næsta áratug. Slíkur niðurskurður myndi koma niður á gríðarlega mörgum ríkisstofnunum en hvað verst á þessum menningarsjóðum – sem yrðu mögulega skornir niður að fullu. Þá segir að stefnt sé að því að einkavæða Corporation for Public Broadcasting (CBP) sem styrkir meðal annars bandaríska ríkisútvarpið National Public Radio (NPR), ríkissjónvarpið Public Broadcasting Service (PBS), og fjölda smærri staðbundinna almenningssjónvarps- og útvarpsstöðva. Ef allt þetta verður skorið niður sparar ríkið þó aðeins 741 milljón dollara á ári, eða 0,016 prósent þeirrar upphæðar sem stefnt er á að spara.

Ríkisstyrktar menningarstofnanir og -sjóðir hafa lengi verið horn í síður margra í Repúblikanaflokknum en það er ekki fyrr en nú, þegar flokkurinn er kominn með meirhluta í báðum deildum bandaríska þingsins, sem draumurinn um að leggja þessar stofnanir niður getur orðið að veruleika. Listamenn hafi brugðist ókvæða við fréttunum og vitnar The Hill meðal annars í Suzanne Nossel, hjá rithöfundasambandi Bandaríkjanna (PEN America): „Jafnvel þó ekki væri um svo mikilvæga fjárhagslega lífæð að ræða, er verið að slá listamenn, rithöfunda, fræði- og menntamenn utanundir, og þeir eru enn að átta sig á því að stjórnin álítur verk þeirra einskis verð.“