Gítarleikarinn Tommy Allsup er látinn 85 ára – Átti sæti í flugvélina sem hrapaði með Buddy Holly innanborðs
Gítarleikarinn Tommy Allsup er látinn, 85 ára aldri. Allsup vann til Grammy-verðlauna auk þess að leika með fjölmörgum þekktum listamönnum á borð við Willie Nelson, Roy Orbison, Merle Haggard og Buddy Holly.
Hann er þó ekki síst þekktur fyrir að hafa tapað einu örlagaríkasta peningakasti rokksögunnar þann 3. febrúar 1959. Tapið bjargaði lífi hans þar sem hann missti sæti sitt í flugvél sem átti eftir að brotlenda og með nokkra vinsælustu rokktónlistarmenn þess tíma innanborðs, þá Buddy Holly, J.P. „The Big Bopper“ Richardson og Richie Valens. Valens hafði náð að vinna sætið af Allsup í peningakastinu, en Big Bopper var einnig óvænt um borð því hann hafði fengið flensu og fékk því að taka sæti Waylon Jennings, annars meðlims úr sveit Buddys Holly, sem átti síðar eftir að verða ein þekktasta stjarna kántrítónlistarheimsins. Allsup sagði síðar að hann hugsaði um atvikið á hverjum einasta degi og þakkaði Guði fyrir að hafa fengið að lifa.