Textaverk um þrjátíu listamanna sýnd í Listasafni Íslands – Verk úr einkasafni Péturs Arasonar og Rögnu Róbertsdóttur
Á sýningunni TEXTI í Listasafni Íslands eru sýnd textaverk um þrjátíu íslenskra og erlendra listamanna. Verkin eru öll úr einkasafni Péturs Arasonar og Rögnu Róbertsdóttur. Birta Guðjónsdóttir er sýningarstjóri í Listasafninu en hún hefur einnig unnið í rúm tíu ár með hjónunum við uppsetningar á sýningum úr safneign þeirra.
„Pétur og Ragna hafa í rúma fjóra áratugi verið að safna samtímamyndlist eftir innlenda og erlenda listamenn, verkum sem eru gerð um og eftir 1960 til dagsins í dag. Þau eiga allt frá einu verki upp í fjörtíu verk eftir sama listamanninn. Listaverk í þeirra eign eru um þúsund talsins og af þeim eru um 150 verk með texta og á sýningunni má sjá um 60 þeirra. Þannig að við sýnum toppinn af ísjakanum,“ segir Birta.
„Verkin á sýningunni eru valin með ýmsa útgangspunkta að leiðarljósi. Úrvalið gefur góða innsýn í þau textaverk sem eru í eigu Péturs og Rögnu og sýnir einnig hversu breitt svið texti í myndlist spannar. Textinn getur verið allt frá tölustöfum yfir í það að vera ljóðrænn texti. Mörg verk á þessari sýningu brúa bilið milli myndlistar og bókmennta og pota í fyrirframgefnar hugmyndir um að bókmenntir og myndlist séu alltaf aðskilin. Það er sérstaklega áhugavert í ljósi menningarbakgrunns Íslendinga sem söguþjóðar að skoða hér texta í myndlist og um leið má velta fyrir sér hvort við séum að gleyma myndlistinni sem hluta af bókmenntunum.“
Pétur og Ragna hafa tengst vináttuböndum mörgum þeirra listamanna sem verk eiga á sýningunni. „Margir safnarar safna verkum eftir listamenn sem þeir hafa aldrei hitt en Pétur og Ragna hafa myndað sérstaklega sterk vináttubönd við langflesta listamennina sem þau eiga verk eftir. Þannig að það hefur verið samræða og stundum samstarf milli þeirra sem safnara og listamannanna. Þetta gerir þeirra söfnunarsögu mjög sérstaka,“ segir Birta.
Einn þeirra listamanna sem eiga verk á sýningunni er einn af mikilvægustu myndlistarmönnum samtímans, bandaríski listamaðurinn Lawrence Weiner, en verk hans má sjá bæði inni í sal Listasafnsins og á framhlið safnbyggingarinnar. „Weiner kom með miklum krafti inn í konseptlistina upp úr miðjum sjöunda áratugnum,“ segir Birta. „Hann er vinur Péturs og Rögnu og hefur unnið töluvert á Íslandi. Það á við um verk hans og fleiri listamanna á sýningunni að þau taka mið af staðsetningu og samhengi. Við komum með tillögu að uppsetningu á verki hans utan á safnbygginguna sem hann samþykkti og sagðist vera sérstaklega ánægður að geta með verki sínu glatt endurnar og svanina á tjörninni.“