Ragnhildur Þóra Ágústsdóttir sýnir í Gallerí Gróttu
Sýning Ragnhildar Þóru Ágústsdóttur, Allt nema fuglinn fljúgandi, er í Gallerí Gróttu og mun standa til 30. september. Viðfangsefni á sýningunni eru náttúrumyndir þar sem íslenskir fuglar eru í lykilhlutverki. Ragnhildur vinnur verk sín með vatnslitum, gouache og kaffi á pappír. Listakonan er fædd í Stykkishólmi en býr og starfar í Reykjavík. Hún útskrifaðist frá Roger Williams University í Bandaríkjunum árið 2002.
Spurð um fuglamyndir sínar segir Ragnhildur: „Frá því ég útskrifaðist hef ég nánast einungis unnið með olíu á striga. Á námsárunum vann ég stórar og miklar abstrakt myndir þar sem ég reyndi að fá olíuna til að hegða sér eins og vatnsliti. Einnig skrifaði ég óhemju mikið af abstrakt ljóðum og örsögum. Eftir að ég kom heim breyttist allt þetta og ég fór að vinna figúratíft og með meira raunsæi að leiðarljósi. Fyrstu árin voru verkin dýr á flötu landslagi, nokkurs konar leikmynd, en þróunin varð í átt að hortus conclusus eða afgirtum görðum sem er listakonsept frá miðöldum. Þessa garða fyllti ég með með trjám, blómum, jurtum og svo fuglum. Fyrir þremur árum kom tímabil þar sem ég gat ekki unnið með olíuna og ég ákvað að nýta tímann og gera nokkurs konar stúdíur og fugla. Þetta æxlaðist svo þannig að ég fór að mála aftur með olíunni en hætti aldrei að gera fuglana.“
Hvaða fyrirmyndir hefurðu þegar þú gerir fuglamyndir. Skoðarðu til dæmis ljósmyndir af hinum ýmsu tegundum?
„Hér áður fyrr fóru listamenn út, skutu fugla, stoppuðu þá upp og gerðu síðan gullfallegar myndir. Gott dæmi um það er John Audubon sem er frægastur fyrir Birds of America en hann drap mörg þúsund fugla í nafni listarinnar. Ég er svo mikill dýravinur að mig hryllir við þeirri hugmynd. Ég tek saman margar myndir sem ég skissa út frá og hef til hliðsjónar og vinn síðan mín eigin verk.“
Ragnhildur er lengi að gera hverja mynd. „Það er mynd á sýningunni sem ég byrjaði að mála árið 2013 og kláraði ekki fyrr en í fyrra. Þetta er tímafrekt en venjulega tekur tvo til þrjá mánuði að mála hverja mynd.“